Një dokument zyrtar i Ministrisë së Punëve të Jashtme të Maqedonisë, i siguruar ekskluzivisht nga MacedoniaPress, hedh dyshime serioze mbi versionin zyrtar të ngjarjeve të 9 dhe 10 majit 2015 në Kumanovë.
Bëhet fjalë për një shkresë zyrtare të datës 12 maj 2015, përmes së cilës MPJ-ja e atëhershme e Republikës së Maqedonisë njofton Ambasadën e Republikës së Kosovës në Shkup për shtetasit kosovarë të arrestuar gjatë aksionit policor në Lagjen e Trimave në Kumanovë.
Por ajo që e bën tronditës këtë dokument është fakti se në listën e personave të “privuar nga liria” figurojnë edhe emrat e:
- Mirsad Ndrecaj
- Beg Rizaj
Të dy këta persona, sipas versionit zyrtar të autoriteteve maqedonase, rezultuan të vrarë gjatë përleshjeve të armatosura në Kumanovë.
Pyetja që shtrohet publikisht pas publikimit të këtij dokumenti është:
Si është e mundur që dy persona të evidentohen si të arrestuar nga institucionet shtetërore, ndërsa një ditë më pas të shpallen të vdekur?
Ky dokument hap dilema të mëdha mbi atë që realisht ka ndodhur gjatë operacionit policor të vitit 2015, një nga ngjarjet më të errëta dhe më të debatueshme në historinë e fundit të Maqedonisë së Veriut.
Nëse dokumenti është autentik – dhe gjithçka tregon se bëhet fjalë për korrespondencë zyrtare institucionale – atëherë lindin dyshime serioze:
- A janë ekzekutuar Beg Rizaj dhe Mirsad Ndrecaj pas arrestimit?
- Kush kishte interes që ata të mos dilnin të gjallë nga Kumanova?
- A është fshehur e vërteta për operacionin policor?
- Dhe pse për 10 vite askush nuk ka dhënë përgjegjësi për kundërthëniet në versionin zyrtar?
Ngjarjet e Kumanovës vazhdojnë të mbeten një plagë e hapur për opinionin shqiptar, ndërsa ky dokument mund të rikthejë kërkesat për një hetim të ri ndërkombëtar dhe zbardhje të plotë të asaj që ndodhi më 9 dhe 10 maj 2015.
