Kryetari Filipçe: Qeveria të tërhiqet nga shfuqizimi i Qeverisë teknike, përndryshe LSDM do të tërhiqet nga puna për Kodin Zgjedhor
🎙️ Më lejoni të informoj të gjithë opinionin publik për hapat e ardhshëm të grupit parlamentar të Lidhjes Socialdemokrate të Maqedonisë dhe koalicionit në lidhje me miratimin e Ligjit për Qeverinë, me të cilin parashihet shfuqizimi i Qeverisë së Përzhinës.
Ne kemi theksuar disa herë se konsiderojmë që në këtë mënyrë, që përfaqëson një stil plotësisht autokratik të qeverisjes nga ana e kësaj pushteti — dhe ky nuk është rasti i vetëm, por vetëm një nga shumë — Qeveria teknike nuk duhet dhe nuk mund të shfuqizohet. Ajo është garancia e vetme për zhvillimin e zgjedhjeve të lira dhe demokratike.
Në një situatë kur ekziston kontroll i plotë i pushtetit mbi gjyqësorin, kur emërohen persona partiakë si gjyqtarë dhe prokurorë, kur kryeministri pa asnjë hezitim, nga foltorja e Kuvendit dhe nga konferencat për shtyp, publikisht jep sinjale apo urdhra ndaj prokurorëve dhe ushtron presion mbi drejtësinë, dhe kur nuk dihet si, në çfarë mënyre ruhen dhe do të përdoren apo tashmë po përdoren të dhënat nga sistemi “Safe City”, kjo thjesht nuk guxon të ndodhë.
Ky stil i qeverisjes është i barabartë me stilin e qeverisjes nga koha e Nikolla Gruevskit, nga viti 2006 deri në vitin 2016. Prandaj, nëse sot ky ligj kalon në Komision dhe pushteti vazhdon procedurën parlamentare, grupi ynë parlamentar do të tërhiqet nga grupi punues për përgatitjen e Kodit Zgjedhor.
Ky Ligj për Qeverinë dhe shfuqizimi i Qeverisë së Përzhinës duhet të tërhiqet nga pushteti. Këto praktika autokratike nuk janë të pranueshme dhe nuk do të pranohen. Ju rikujtoj se ky ligj u miratua për zgjedhjet e vitit 2016, por me kërkesë të Hristijan Mickoskit u rikthye në vitin 2018 dhe mbeti në fuqi, me kërkesën e tyre, edhe për zgjedhjet parlamentare të vitit 2020.
Prandaj, edhe njëherë e përsëris: pushteti duhet ta tërheqë këtë ligj. Qeveria e Përzhinës, si garancia e vetme në këtë formë aktuale për zhvillimin e zgjedhjeve të lira dhe demokratike, duhet të mbetet. Në të kundërtën, ne do të tërhiqemi nga puna për Kodin Zgjedhor në kuadër të grupit punues që udhëhiqet nga Ministria e Drejtësisë.
